Një milion viruse kompjuterike në qarkullim

Një milion viruse kompjuterike në qarkullim



Numri i viruseve, krimbave, trojanëve dhe formave tjera të sulmuesve kompjuterikë ka kaluar kufirin prej një milion sish, njoftojnë nga Symantec. Siç edhe është pritur, masa më e madhe e sulmeve drejtohen kah kompjuterët me sistemet operative të Windowsit.
Kjo arritje “e rëndësishme” është publikuar brenda raportit gjysmëvjeçar të Symantec me emrin Internet Security Threat Report. Brenda raportit të përmendur qëndron edhe e dhëna brengosëse se shumica e sulmuesve dashakeq të kompjuterit janë krijuar apo hetuar për herë të parë gjatë 12 muajve të fundit.

Raporti i fundit Internet Security Threat Report mbulon periudhën kohore gjashtëmujore të fundit të vitit 2007, kur në Symantec kanë detektuar madje 499.811 sulme të reja, që sipas të dhënave të tyre është rritje prej 136 për qind në krahasim me gjashtë muajt e parë të njëjtit vit.

Gjatë tërë vitit 2007 në Symantec kanë detektuar diç më shumë se 700.000 sulme të reja kompjuterike me të cilën gjë, numri i përgjithshëm i viruseve, krimbave dhe trojanëve të cilët detektohen nga softuerët kundër viruseve nga Symantec është ngritur në shifrën prej 1.122.311.